Miuyon si Presidential Communications Office Undersecretary Claire Castro sa pahayag ni Vice President Sara Duterte nga “lubog sa baha” ang nasud, apan iyang gitumbok ang Davao City isip ehemplo sa problema sa pagbaha.
Matod ni Castro, nakig-koordinar na ang Palasyo aron matutukan ang sitwasyon sa dakbayan, ug gimanduan na ni Pangulong Ferdinand R. Marcos Jr. ang Department of Public Works and Highways o DPWH nga atimanon ang usa ka flood control project nga giingong wala ma-dredge o nalimpyohan og tarong sukad pa niadtong 2019.
Apan base sa kahimtang, makita nga ang problema sa baha dili lamang limitado sa Davao City, tungod kay dugay na usab kini nga ginatubag sa ubang bahin sa nasud, lakip sa Luzon, diin balik-balik nga nakasinati og pagbaha ang pipila ka lugar.
Pero bisan pa niini, mas gipili ni Castro ang Davao City isip iyang ehemplo sa pagtubag sa pahayag ni Vice President Duterte.
Dugang pa, ginasusi usab karon sa gobyerno ang giingong 13,917 ka flood control projects nga nadeklarang nahuman atol sa termino ni kanhing Pangulong Rodrigo Duterte.
Sa pagkakaron, padayon ang assessment ug coordination sa mga ahensya aron matubag ang problema sa pagbaha sa nagkalain-laing lugar.| VIA BOMBO EROS PAJOTA
