Nagpasidaan ang Bureau of Immigration (BI) batok sa padayon nga paggamit sa “backdoor exits” sa pipila ka mga Pilipino sa paggawas sa nasud, human naluwas ang usa ka 24-anyos nga biktima sa human trafficking nga nadani pinaagi sa peke nga trabaho nga saad og mas taas nga sweldo.
Subay sa imbestigasyon, ang biktima nakagawas sa Pilipinas pinaagi sa Tawi-Tawi ug miagi sa lain-laing nasud hangtod nakaabot sa Cambodia, diin siya gipugos sa pagtrabaho sa “love scam” imbis nga sa legal nga trabaho nga receptionist sa Myanmar. Gipasabot ni Immigration Commissioner Joel Anthony Viado nga ang paggamit sa ilegal nga ruta dakong risgo nga mahimong biktima sa pagpahimulos ug human trafficking, ug mipasidaan nga padayon nga ginabantayan sa ahensya ang susamang modus.
Gipasiugda usab sa BI nga gipalig-on na nila ang border control measures ug pakigtambayayong sa lain-laing ahensya aron mapugngan ang human trafficking ug ilegal nga paggawas sa nasud. Dugang pa, giingon sa ahensya nga importante ang pag-verify sa mga trabaho nga gitanyag online aron malikayan ang pagkapangilad sa mga biktima.
Sa bahin sa usa ka international border management group, gipahayag nga ang problema sa border control usa ka global concern nga nagkinahanglan og mas lig-on nga kooperasyon sa lain-laing nasud. Sa kasamtangan, nagpadayon ang panawagan sa mga otoridad sa publiko nga magpabiling mabinantayon ug ireport ang mga kahimtang nga posibleng may kalabotan sa illegal recruitment ug trafficking.
