Gibasura sa Korte Suprema ang hangyo ni Senador Ronald “Bato” Dela Rosa nga magpagawas og Temporary Restraining Order (TRO) aron mapahunong ang pagpatuman sa arrest warrant gikan sa International Criminal Court (ICC). Sumala pa sa special en banc session niadtong Mayo 20, 2026, mibotar ang mga mahistrado og 9-5-1 pabor sa pagbasura sa maong hangyo sa senador.
Dugang pa niini, gipatin-aw sa Korte Suprema nga ang desisyon limitado lamang sa interim reliefs sama sa TRO ug Status Quo Ante Order, ug wala pa naghisgot sa pinakauyok nga isyu sa kaso.Lakip sa gi-apil sa petisyon, gihangyo ni Dela Rosa nga dili ipatuman sa DILG, DOJ, DFA, PNP, NBI, Bureau of Immigration, AFP, ug CIDG ang bisan unsang ICC warrant, Interpol red notice, o foreign judicial instrument kung walay Philippine court warrant.
Sa kasamtangan, ang ICC arrest warrant batok kaniya may kalabotan sa mga alegasyon nga crimes against humanity maylabot sa Davao Death Squad ug sa anti-drug operations sa miaging administrasyon. Dugang pa niini, gilauman nga ipagawas sa Mayo 25, 2026 ang bug-os nga resolusyon ug mga opinion sa mga mahistrado, samtang ang main petition nagpabilin pa nga pending sa Korte Suprema.
