Nagpasidaan ang Bangko Sentral ng Pilipinas (BSP) batok sa ilegal nga paghimo, pag-imprenta, ug paggamit sa peke nga kuwarta ingon man sa mga materyales nga adunay hulagway o kaparehas sa legal tender sa Pilipinas.
Ubos sa Circular No. 829, Series of 2014, gidili ang paghimo, pag-imprenta, pag-apod-apod, o paggamit sa mga handbill, advertisement, placard, card, ug uban pang materyales nga adunay hulagway, kopya, o susama sa legal tender nga salaping papel sa Pilipinas pag walay pagtugot gikan sa BSP.
Gipadayag sa ahensya nga ang bisan kinsa nga molapas sa maong regulasyon mahimong mapriso sulod sa lima hangtod napulo ka tuig.
Samtang, gipasabot sa BSP nga balido gihapon sa mga transaksyon ang mga salaping papel ug polymer banknotes bisan pa kung adunay pilo o kunot.
Apan, gitambagan ang publiko nga dili plantsahon ang kuwarta o ibutang kini sa sobra ka init o tugnaw nga lugar aron malikayan ang pagkadaot niini.
Ginadili usab sa BSP ang pagsulat o pagmarka sa kuwarta, sobra nga paglukot, pagputol, pagbuslot, pag-staple, pagdikit, ug uban pang paagi sa pagkadaot sa salapi.
Ang mga molapas niini mahimong pamultahon og hangtod ₱20,000 o pagka balhog sa prisohan og hangtod lima ka tuig subay sa Presidential Decree No. 247 o Anti-Mutilation Law.
