DAVAO CITY – Dungan sa pagsaulog sa ika-78 nga adlawng natawhan ni Former President Rodrigo Duterte, pormal nang giablihan kaniadtong adlawng Dominggo ang bag-ong House of Hope nga nahimutang sa Margarita Village ning dakbayan sa Davao.
Gisugdan ang renovation sa House of Hope kaniadtong Nobyembre ning nakalabayng tuig, nga gipunduhan og P5 million gikan sa mga nagsuporta ni kanhi Pangulong Digong.
Tuig 2010 pa dihang gidonar sa kanhi pangulo ang iyang kaugalingong luna nga gitukuran sa maong gambalay nga nahimong puy-anan alang sa mga batang adunay cancer.
Anaa sa nahitabong inauguration ug blessing si Former President Duterte, Senator Christopher Bong Go, ug mga opisyal sa House of Hope Foundation for Kids with Cancer Inc.
Samtang usa ka pribadong kumpanya ang nagdonar og sakyanan nga magamit sa foundation alang sa mga cancer patients.
Kahinumdumang gilagdaan sa panahon sa iyang pangatungdanan kaniadtong Pebrero 2019 ang Republic Act No. 11215 o ang National Integrated Cancer Control Act, nga nagtumong sa paglugway sa pagpanambal ug pagpaalim sa mga cancer patients nga natunong sa underprivileged and marginalized sector dinhi sa nasud.
via || Bombo LJF
