Gipadayag ni Tingog Party-list Representative Jude Acidre nga nagpabiling lig-on ang suporta sa mga miyembro sa House of Representatives kang House Speaker Faustino Dy bisan usa na ka semana sukad nagsugod ang Second Regular Session sa ika-20 nga Kongreso.
Matod ni Acidre, wala pa siyay nahibal-an nga bisan usa ka magbabalaod ang mibawi sa ilang pagsalig kang Speaker Dy, ug nagpabilin usab nga nagkahiusa ang mga miyembro sa Kamara sa ilang gisuportahang direksyon ug mga prayoridad sa ubos nga kapulungan.
Bisan pa sa pahayag ni Pangulong Ferdinand Marcos Jr. nga adunay mga kasong posibleng ipasaka batok sa usa ka “dating House Speaker,” giingon ni Acidre nga wala kini makaapekto sa suporta sa mga kongresista kang Speaker Dy.
Kahinumduman nga si Speaker Dy maoy mipuli kang kanhi House Speaker Martin Romualdez, nga nalambigit sa giingong kontrobersiya sa flood control projects.
Gipasiugda usab ni Acidre nga nagpadayon ang House of Representatives sa pagsuporta sa legislative agenda sa administrasyon, lakip ang mga reporma sa buhis, sektor sa enerhiya, edukasyon, panglawas ug uban pang mga prayoridad sa gobyerno.
