Nagsang-at og civil forfeiture case ang Anti-Money Laundering Council (AMLC) nga naglakip sa mga bank account ni kanhing House Speaker Martin Romualdez, subay sa kumpirmasyon ni AMLC financial investigator Jan Mark Busa atol sa iyang pagtug-an atubangan sa Sandiganbayan Third Division.
Matod ni Busa, una nang nagpasaka ang AMLC og petisyon alang sa freeze order ug aplikasyon alang sa bank inquiry, nga giaprobahan sa Court of Appeals. Kabahin kini sa imbestigasyon nga gisugdan human sa referral gikan sa Office of the Ombudsman.
Sa pagsusi sa AMLC, natala ang 1,951 ka transaksiyon sa 35 ka bank account ni Romualdez gikan Abril 2003 hangtod Oktubre 2025. Mikabat sa ₱3.9 bilyon ang mga transaksiyon sa wala pa siya mosulod sa politika, samtang ₱4.5 bilyon ang natala gikan Hunyo 2022 hangtod Septiyembre 2025, panahon nga nagserbisyo siya isip House Speaker.
Sa cross-examination, gipatin-aw ni Busa nga walay direktang deposito o pagbalhin og kuwarta gikan sa mga kontraktor, Department of Public Works and Highways (DPWH), ug kang kanhing Ako Bicol party-list Representative Zaldy Co nga nasuta sa ilang gisusi nga bank records ug misulod sa mga account ni Romualdez.
Apan, giklaro niya nga wala maapil sa maong pagsusi ang mga cash inflow nga wala moagi o marekord sa sistema sa bangko. Sa laing bahin, gihisgotan sa kampo sa depensa ang dugay nang mga interes ni Romualdez sa negosyo ug pamuhunan.
Si Romualdez nag-atubang usab og plunder case kalabot sa giingong ₱7.44 bilyong kickback gikan sa mga proyekto sa flood control ug imprastraktura tali sa 2022 ug 2025.
