Nauli na sa Pilipinas ang mga cadaver ni Overseas Filipino Worker (OFW) Jayson Bolingon Martinez, nga namatay human nahulogan og falling debris gikan sa na intercept nga drone duol sa Shaybah oilfield sa Saudi Arabia kaniadtong Oktubre 21, 2026.
Sakay sa Saudia Airlines Flight SV862 ang mga patay’ng lawas sa OFW. Gisugat kini sa mga opisyal sa Department of Migrant Workers (DMW) ug Overseas Workers Welfare Administration (OWWA), nga mipadayag usab sa ilang pahasubo ngadto sa pamilya sa namatay.
Giatiman sa iyang employer, sa pakigtambayayong sa Migrant Workers Office sa Al Khobar, Philippine Embassy sa Riyadh ug mga awtoridad sa Saudi Arabia, ang mga papeles ug uban pang kinahanglanon alang sa pagpauli kay Martinez sa Pilipinas.
Lakip usab sa giatiman sa kompanya ang wala pa mabayrang sweldo, end-of-service benefits, ug uban pang benepisyo nga angay madawat sa OFW.
Samtang, nagpadayon ang DMW ug OWWA sa paghatag og tabang sa pamilya, lakip ang pinansyal ug burial assistance, ingon man suporta sa edukasyon sa mga anak sa namatay.
Namatay usab sa maong insidente ang usa ka Nepalese national nga kauban niya sa sakyanan.
Si Martinez usa lamang sa liboan ka mga OFW nga nagsakripisyo sa gawas sa nasod alang sa kaugmaon sa iyang pamilya, apan sa subo nga higayon, naapil sa trahedya nga dala sa kagubot sa maong rehiyon.
