Nagpadayon sa maayong dagan ang negosasyon tali sa Pilipinas ug Estados Unidos kabahin sa Pax Silica initiative, sumala sa Department of Trade and Industry (DTI), bisan wala pay planong ipahibalo nga kasabutan atol sa umaabot nga 49th ASEAN Summit.
Matod ni Trade Undersecretary Ceferino Rodolfo, ang kasabotan kabahin sa maong proyekto angay nga hatagan og kaugalingong panahon ug dili ipares sa laing dagkong kalihokan sama sa ASEAN Summit nga magsugod sa Nobyembre 15, 2026.
Dugang pa niya, tungod kay dako ug makausab sa industriya ang maong proyekto, mas angay nga adunay kaugalingong plataporma ang pagpahibalo niini.
Giplanong tukoron ang Pax Silica hub sa New Clark City, Capas, Tarlac, isip usa sa importanteng bahin sa Luzon Economic Corridor. Gilauman nga ang Bases Conversion and Development Authority (BCDA) maoy manguna sa pagdumala sa maong proyekto.
Una nang miingon ang BCDA nga gilauman ang pagpirma sa agreement isip usa sa dagkong pahibalo atol sa ASEAN Summit. Apan gipatin-aw ni US Ambassador to the Philippines Lee Lipton nga wala gayoy giplanong pahibalo kabahin sa Pax Silica Economic Security Zone panahon sa summit, ug ang mga desisyon himuon lamang human sa hingpit nga konsultasyon sa gobyerno sa Pilipinas.
Samtang, gipasiugda ni Rodolfo nga wala makaapekto sa negosasyon ang mga pagbatok sa pipila ka sektor sa proyekto, tungod kay kabahin na sa proseso ang konsultasyon ug pakigpulong sa mga apektadong grupo.
Nagpabilin usab ang paglaum sa Pilipinas nga mahuman ang kasabutan uban sa Estados Unidos sulod niining tuiga, samtang target nga masugdan ang pagtukod sa tech hub sa 2028.
