Gipakusogan sa National Capital Region Police Office (NCRPO) ang operasyon batok sa ilegal nga koneksiyon sa tubig samtang nagpadayon ang epekto sa El Niño sa nasud.
Misunod kini sa mando ni NCRPO chief Police Brigadier General Christopher Abrahano ngadto sa lima ka police district sa tibuok capital region nga hugtan ang operasyon batok sa mga indibidwal ug grupo nga nagpahimulos sa taas nga panginahanglan ug konsumo sa tubig.
Gibantayan sa mga kapulisan ang posibleng mga pamaagi sa ilegal nga pagkonektar sa suplay sa tubig, lakip ang mga konsumidor nga naningkamot nga makagamit niini nga walay bayad.
Samtang, gipalig-on usab ang koordinasyon sa mga pulis, water concessionaires, local government units, ug mga opisyal sa barangay aron mailhan ug mabantayan ang mga lugar nga mas dali mapahimuslan sa maong ilegal nga kalihokan.
Ang NCRPO nagpaniguro nga adunay angay nga forum alang sa pagreport sa mga ilegal nga koneksiyon, dali nga pagtubag sa mga reklamo ug hiniusang inspeksiyon kung gikinahanglan.
Dugang pa niini, gimandoan ang matag pulis nga pangitaon ug pasakaan og kaso ang mga nagpondo sa maong ilegal nga operasyon, ilabi na ang mga indibidwal nga nagkolekta og bayad ug nagpadali sa pagbutang og dili awtorisadong koneksiyon sa tubig.
