Gimandoan sa Department of Budget and Management o DBM ang mga Regional Development Council o RDC nga sugdan na karung Oktubre ang pagrepaso ug pag-prayoridad sa mga programa ug proyekto alang sa 2028 national budget.
Subay sa hiniusang guidelines sa DBM ug Department of Economy, Planning and Development o DEPDev, kinahanglan makompleto sa mga RDC ang pagrepaso sa mga gisugyot nga proyekto sa Disyembre 11, 2026 ug mapadala ang mga giendorso nga proposal ngadto sa central offices sa mga ahensiya sa Disyembre 18.
Sa timeline, kinahanglan mahatag sa mga central office ang prayoridad sa ilang regional offices sa Oktubre 13, samtang ang konsultasyon sa mga stakeholders kinahanglan mahuman sa Oktubre 30. Ang pag-andam sa regional budget proposals gitakdang makompleto sa Nobyembre 13.
Kabahin sa bag-ong pamaagi ang pagpalig-on sa papel sa mga RDC pinaagi sa pagkinahanglan sa ilang endorsement sa mga programa, kalihokan ug proyekto aron masiguro nga nahiuyon kini sa aktuwal nga panginahanglan sa rehiyon ug sa nasudnong prayoridad sa kalamboan.
Sa pagtimbang-timbang sa mga proposal, konsiderahon sa mga ahensiya ang kahandam sa proyekto alang sa implementasyon, nag-unang mga prayoridad sa rehiyon, miaging alokasyon ug paggamit sa pondo, ingon man ang mga kakulangan sa paghatag og serbisyo.
Kinahanglan usab nga ang mga imprastraktura sama sa flood control projects ug mga proyekto sa airport ug pantalan nahiuyon sa may kalabotang master plan sa sektor o rehiyon.
Human niini, konsolidahon ug susihon sa mga central office sa mga ahensiya ang mga proposal, lakip ang rekomendasyon sa RDC ug ang kahandam sa mga proyekto. Wala pa maglakip ang unang mga proposal sa pinal nga budget ceiling o kantidad sa pondo.
Ang pinal nga deadline sa pagsumite sa 2028 budget proposal ipahibalo pinaagi sa National Budget Call sa sunod tuig, human maaprobahan ang 2027 national budget.
