Nadismaya si Senate President Sherwin Gatchalian sa kahimtang sa opisina nga gibilin ni Senador Jinggoy Estrada alang kang Senador Vicente “Tito” Sotto III human gikatahong gikuha gikan niini ang pipila ka fixtures ug kagamitan.
Sumala kang Gatchalian, halos walay sulod ang opisina ug nagkinahanglan pa kini og igong panahon aron mahapsay ug ma-renovate. Mipasalig siya nga motabang ang Senado sa pagpaayo niini, apan matod niya, mas maayo unta kon adunay hapsay nga koordinasyon tali sa mga opisina sa wala pa ang turnover.
Una nang mipatik si Senador Panfilo “Ping” Lacson og hulagway nga gihimo pinaagi sa artificial intelligence o AI, nga nagpakita kang Sotto sulod sa ngitngit ug halos walay sulod nga opisina.
Lakip sa gikatahong gikuha ang mga floor tiles, lighting fixtures, glass panels, kabinet ug pipila ka kagamitan sa kasilyas.
Depensa sa opisina ni Estrada, gipahibalo na nila ang kampo ni Sotto sa wala pa ang deadline kaniadtong Oktubre 5,2026 nga ibalhin ang mga fixtures ug kagamitan ngadto sa bag-ong opisina sa senador.
Matod sa maong opisina, kadaghanan sa mga materyales gipalit gamit ang personal nga kuwarta ni Estrada tungod kay kulang ang badyet nga gigahin sa Senado.
Gikumpara ni Gatchalian ang maong turnover sa gihimo ni Sotto kaniadto, diin gibilin pa niini ang kaugalingong lamesa ug lingkuranan aron dili na mogasto ang sunod nga mogamit sa opisina.
Samtang, gikumpirma ni Gatchalian nga mihangyo ang Office of the Ombudsman nga susihon ang maong opisina. Iyang gimandoan ang iyang mga kawani nga makigtambayayong ug magmatinud-anon sa paghatag sa mga dokumento.
Gisusi usab sa Government Service Insurance System o GSIS ang opisina tungod sa kabalaka sa kalig-on sa estruktura niini, nga gipanag-iya sa maong ahensiya.
