Personal nga mitambong si Vice President Sara Duterte sa Quezon City Regional Trial Court karong adlawa alang sa iyang arraignment sa tulo ka counts sa grave threats, apan wala madayon ang pagbasa sa mga sumbong human gi-postpone sa hukom ang proceedings.
Mga alas 7:57 sa buntag miadto si Duterte sa Branch 98 sa Quezon City Hall of Justice. Wala pa molapas og usa ka oras, migawas na siya sa korte.
Sumala sa iyang abogado nga si Atty. Paul Lawrence Lim, wala madayon ang arraignment tungod kay adunay pending nga motion for partial reconsideration ad cautelam sa trial court ug petition for certiorari sa Korte Suprema.
Ang motion nagtinguha nga usbon ang naunang desisyon sa korte nga nagbasura sa hangyo sa bise presidente nga mag-inhibit ang presiding judge sa pagdumala sa iyang kaso. Samtang wala pa mahukmi ang maong mga petisyon, gipili sa hukom nga ipagpaliban ang arraignment ug magtakda og bag-ong petsa.
Human sa pagbisita sa korte, nagpasalamat si Duterte sa iyang mga tigpaluyo nga mitambong sa hearing.
Ang tulo ka grave threats case may kalabotan sa giingong mga hulga batok kang Presidente Ferdinand “Bongbong” Marcos Jr., First Lady Liza Araneta-Marcos ug kanhi House Speaker Martin Romualdez. Ang mga alegasyon magpabilin nga kaso nga kinahanglan husayon sa korte ug wala pa kini mapamatud-ang sala ni Duterte.
