Aksyonan na sa Department of Agriculture aron mapugngan ang posibleng pagsaka sa presyo sa mga pagkaon tungod sa epekto sa El Niño.
Matud kang Agriculture Secretary Francisco Tiu Laurel Jr., ₱45 bilyon ang giandam sa gobyerno alang sa El Niño response, diin ₱6.2 bilyon niini ang na-release na.
Gilauman usab nga adunay dugang nga ₱5,000 nga cash assistance alang sa mga mag-uuma sa humay isip dugang nga tabang sa pag-atubang sa epekto sa hulaw.
Alang sa food security, gipasalig sa DA nga adunay igo nga buffer stock sa importanteng mga pagkaon, lakip ang bugas nga adunay kapin 75 ka adlaw nga suplay, manok nga 125 ka adlaw ug baboy nga 170 ka adlaw.
Samtang, nagpatuman ang DA og “Double Down Intervention” sa Visayas ug Mindanao aron mapadako ang produksiyon sa mga lugar nga adunay mas maayong suplay sa tubig ug makatabang sa pagtabon sa posibleng kakulang sa ubang lugar.
Sa Davao Region, nag-andam ang DA og kapin ₱921 milyon alang sa El Niño Action Plan, diin dakong bahin niini ipunting sa mga lugar nga dili kaayo delikado sa hulaw aron mapadako ang produksiyon sa pagkaon ug mga prutas.
Lakip usab sa mga pagpangandam ang paghatag og drought-resistant seeds, water pumps, mga pasilidad sa irigasyon ug uban pang suporta alang sa mga mag-uuma.
Gilauman nga moabot sa peak ang El Niño gikan sa Nobyembre 2026 hangtod sa unang bahin sa 2027, busa gipakusgan na sa DA ang mga lakang aron dili maapektuhan pag-ayo ang produksiyon ug suplay sa pagkaon.
Kahinumdoman nga misaka ang inflation sa nasod KAniadtong Septyembre, nga usa sa mga hinungdan sa pagpalig-on sa mga lakang sa gobyerno aron maprotektahan ang food supply ug malikayan ang dugang nga pressure sa presyo.
Sa pagkakaron, padayon ang pagpangandam sa DA ug mga regional field offices aron masiguro nga adunay igo nga pagkaon ug suporta sa mga mag-uuma samtang nagkaduol ang gipaabot nga peak sa El Niño.
