Gipasiugda sa Department of Environment and Natural Resources o DENR XI ug mga opisyal sa Mati City ang pakigtambayayong alang sa environmental protection ug sustainable development atol sa courtesy call sa DENR.
Gitambongan sa DENR XI, ubos sa pagpanguna ni Regional Executive Director Atty. Ma. Mercedes V. Dumagan, si 2nd District Representative Cheeno Miguel D. Almario ug Mati City Mayor Joel Mayo Z. Almario sa Mati City, Davao Oriental.
Gipanghisgutan ang paghatag og DENR-grown seedlings ngadto sa mga eskwelahan, barangay ug public spaces, ilabina ang mga indigenous ug climate-resilient species.
Gitan-aw usab ang posibilidad nga magamit ang mga nakumpiskang forest products ug giant bamboo alang sa paghimo og furniture ug livelihood opportunities.
Gipasiugda sa mga opisyal ang pagpalig-on sa bamboo ug forest-based industries pinaagi sa mas maayong teknolohiya, pagproseso ug market access.
Gihatagan usab og gibug-aton ang hustong pagplano ug assessment sa resources aron maseguro nga sustainable ang pagpalambo sa bamboo industry.
Matud sa DENR XI, gihisgutan usab ang mga development project sa Mati City, lakip ang Mati Airport ug Fish Port, ug ang potensyal sa mas episyenteng cargo operations alang sa lokal nga mga produkto.
Samtang, mipasalig ang DENR XI ug PENRO Davao Oriental nga ipadayon ang koordinasyon aron masuportahan ang development sa siyudad nga dili ikompromiso ang kalikupan ug natural resources.
