Gipasabot ni House Prosecutor o Akbayan Party-list Representative Chel Diokno nga dili awtomatikong magsilbing basihan alang sa mga mosunod nga impeachment proceeding ang bag-ong ruling kabahin sa voting threshold sa impeachment trial ni Vice President Sara Duterte.
Sumala pa ni Diokno nga gigamit sa impeachment court ang ruling nga pro hac vice, kun para lamang sa maong kasamtangang kaso ug sa kasamtangang sirkumstansya sa karong senado.
Pagpaklaro sa opisyal nga lahi ang impeachment court kumpara sa mga regular nga hukmanan nga makahimo og judicial precedent nga kinahanglang sundon subay sa probisyon sa stare decisis.
Tungod niini, gipahayag sa representante nga ang mosunod nga Senado nga molingkod isip Impeachment Court adunay katungod sa paghimo og kaugalingong interpretasyon depende sa ihap sa ilang mga miyembro ug sa mga sirkumstansya sa maong panahon.
