Duha ka trabahante ang buhi nga nasalbar gikan sa usa ka hydropower tunnel sa Nepal, siyam ka adlaw human sila na-trap sulod niini tungod sa grabeng pagbaha ug pagdahili sa yuta sa maong lugar.
Giila ang duha ka survivor nga sila Sanjay Sah, usa ka mechanical foreman, ug Kabir Maharjan, usa ka mechanical supervisor.
Silang duha nakit-an sa tunnel sa Upper Trishuli 3A Hydropower Station sa Rasuwa district niadtong adlaw nga Biyernes.
Sumala sa mga awtoridad, nadungog sa rescue team ang mga tingog gikan sa sulod sa tunnel sa wala pa tukmang nahibal-an ang ilang nahimutangan.
Gidali dayon sila og gawas ug gipailalom sa medical treatment.
Ang pagkasalbar sa duha ka trabahante naghatag og bag-ong paglaum sa mga pamilya sa ubang mga tawo nga padayon gihapong nangita.
Gi bana banaan nga mokabat sa 900 ka trabahante ang posibleng na-trap sa mga tunnel sa nagkalain-laing hydropower projects sa dapit sa Trishuli River human sa katalagman niadtong Agosto 26.
Padayon ang search and rescue operation sa mga awtoridad samtang ilang gisulayan nga maabot ang ubang mga tunnel nga napuno sa lapok, bato ug nagkalain-laing debris.
Ang maong katalagman tungod sa grabeng pagbaha nga gisundan sa pagdahili sa glacier, mga bato ug lapok sa maong lugar.
Daghang mga tawo ang namatay o gikataho nga missing human sa maong kalamidad sa Nepal.
| via Bombo Ray Ann Martinez
