Gipadayag ni House prosecution adviser ug spokesperson Ace Barbers nga klaro kaayong mikunhod ang timbang ug mihuyang si kanhi House Speaker Ferdinand Martin G. Romualdez sa wala pa kini madakpi ug ma-confine sa ospital.
Matud ni Barbers, nakita ug nakaistorya niya si Romualdez usa ka semana sa wala pa ipatuman ang mando sa pagdakop batok niini may kalabotan sa kaso sa pagpangawat og dakong kantidad sa salapi o plunder nga nalambigit sa kontrobersiya sa mga proyekto sa flood control.
Sumala pa ni Barbers, sobra sa hustong timbang si Romualdez mga unom hangtod walo ka bulan ang milabay, apan karon klaro kaayong niniwang ug mihuyang na kini.
Sa kasamtangan, nagpabilin sa kustodiya sa kapulisan si Romualdez samtang naka-confine sa ospital.
Dugang pa, ang iyang kasamtangang kahimtang, lakip na kung magpabilin ba kini sa ospital o ibalhin ngadto sa pasilidad sa detensyon, magdepende sa mahimong desisyon sa Sandiganbayan.
Gibutyag ni Barbers nga base lamang sa iyang personal nga obserbasyon ang iyang mga pahayag kabahin sa kahimtang ni Romualdez.
Sa pagkakaron, nagpabilin ang pagdahom nga inosente si Romualdez hangtod dili pa mapamatud-an ang kasong plunder batok kaniya, samtang nagpadayon ang pagdungog sa maong kaso.
Kahinumduman nga ang kaso batok kang Romualdez nalambigit sa kontrobersiya sa mga proyekto sa flood control.
