Gipasiugda sa prosecution sa ikaduhang adlaw sa impeachment trial batok kang Vice President Sara Duterte nga klaro kunong paglapas sa pagsalig sa publiko ang iyang mga pahayag nga adunay giingong hulga sa kinabuhi nila Pangulong Ferdinand Marcos Jr., First Lady Liza Araneta-Marcos, ug kanhi House Speaker ug Leyte First District Representative Martin Romualdez.
Atol sa pagdungog niadtong Martes, Hulyo 7, gipresentar sa prosecution ang mga kopya sa mga giingong pahayag ni Vice President Duterte niadtong Nobyembre 23, 2024, ug uban pang misunod nga mga pahayag.
Nangutana si Senator-Judge Risa Hontiveros kon nganong giisip nga lig-on nga basehan sa impeachment ang maong mga pahayag.
Matod ni private prosecutor Atty. Amando Ligutan, ang maong mga pahayag kuno nagpakita nga adunay plano o pamaagi ang giingong pagpanghulga, lakip na ang giingong pagkontrata og usa ka mamumuno.
Giingon usab ni Ligutan nga dili kuno normal ang pagpanghulga sa kinabuhi sa usa ka naglingkod nga Presidente, ug matod niya, kini ang unang higayon nga nahitabo ang ingon niini sa kasaysayan sa nasod.
Gipasiugda pa sa prosecution nga ang maong mga giingong lihok usa ka “110 porsiyento” nga paglapas sa pagsalig nga gihatag sa publiko ngadto sa Bise Presidente.
Human sa pagpasabot sa prosecution, wala na mopadayon og pangutana si Hontiveros.
