Nakigpulong si kanhi Department of Public Works and Highways Secretary Manuel Bonoan sa Office of the Ombudsman ug naghatag og testimonya nga adunay kalabotan sa imbestigasyon sa giingong anomalya sa flood control projects.
Matud ni Ombudsman Jesus Crispin Remulla, importante ang mga pahayag ni Bonoan sa ilang padayong pag-usisa sa mga posibleng iregularidad sa mga proyekto sa gobyerno.
Gipadayag ni Remulla nga magpadayon ang koordinasyon sa ilang opisina uban sa mga prosecutors aron masiguro nga dili mapalong o maantala ang pagproseso sa kaso.
Una nang gitugotan sa Ombudsman si Bonoan nga mahimong state witness sa graft case nga may kalabotan sa maong anomalya, diin gikinahanglan ang iyang impormasyon isip kabahin sa imbestigasyon.
Sumala sa Ombudsman, ilang susihon pag-ayo ang mga detalye nga iyang gihatag aron matino ang mga sunod nga lakang sa kaso. Gipasalig usab sa ahensya nga ipadayon ang imbestigasyon batok sa bisan kinsa nga mahimong responsable sa posibleng paglapas sa balaod.
