Misaka na sa 5,835 ang natala nga kaso sa leptospirosis sa tibuok nasud karong tuiga, sumala sa Department of Health o DOH.
Pinakadaghan ang kaso nga natala sa National Capital Region nga adunay 1,733, samtang adunay 632 ka kaso sa Central Luzon ug 561 sa Cagayan Valley.
Base sa pinakabag-ong datos sa DOH, 19 porsyentong mas ubos ang kinatibuk-ang kaso kumpara sa 7,187 nga natala sa samang panahon niaging tuig.
Mikunhod usab ang gidaghanon sa mga namatay, gikan sa 764 niadtong 2025 ngadto sa 385 karong tuiga.
Bisan pa niini, mipahimangno ang DOH nga dili angay magpakampante ang publiko, ilabina karon nga nagpadayon ang pagbaha sa pipila ka lugar.
Pahimangno ni DOH Epidemiology Assistant Secretary Gerna Manatad, ang bisan kinsa nga nakalugsong o na-expose sa baha kinahanglan maligo dayon gamit ang sabon ug limpyo nga tubig.
Importante usab nga magpakonsulta dayon sa health professional aron masusi pag-ayo ang kondisyon ug matino kung gikinahanglan ba ang prophylaxis o preventive medication.
Ang leptospirosis usa ka bacterial infection nga mahimong makuha pinaagi sa direktang pagkontak sa ihi sa mga infected nga mananap sama sa ilaga ug baboy, o sa mga lugar nga nahugawan niini, lakip na ang tubig-baha.
Samtang, gimandoan usab sa Department of Education ang mga pampublikong eskwelahan nga palig-onon ang information campaign batok sa dengue ug leptospirosis.
| via Bombo Ray Ann Martinez
