Miulbo ang sunog sa usa ka bahin sa 9th floor sa Vivaldi Residences sa Davao City kagabii, Agosto 14, nga gilayon girespondehan sa Bureau of Fire Protection Region XI.
Matud sa BFP Davao, nadawat nila ang report alas-8:44 sa gabii ug gipadala dayon ang mga bombero aron mapugngan ang pagkaylap sa kalayo sa building.
Human sa kapin usa ka oras nga firefighting operation, gideklarar sa BFP-XI nga fire out na ang sunog.
Sa pagkakaron, ginatino pa sa mga otoridad kung adunay residente o personnel nga naangol o namatay tungod sa maong insidente.
Wala pa usab mahibal-i ang gibanabanang kantidad sa kadaot sa kabtangan ug kung unsa ang hinungdan sa pagsugod sa kalayo.
Padayon ang imbestigasyon ug assessment sa BFP-XI sa apektadong bahin sa Vivaldi Residences aron makuha ang kompletong detalye sa nahitabo ug masuta ang kahimtang sa building human sa sunog. | VIA BOMBO EROS PAJOTA
