Nagpadayon ang mga boluntaryo sa Philippine Red Cross (PRC) sa pag-repack sa mga relief goods alang sa mga pamilyang naapektuhan sa pagbaha sa Luzon bisan pa sa padayong pag-ulan tungod sa habagat ug Bagyong Maymay.
Gidayig ni PRC Chairman ug CEO Richard J. Gordon ang sakripisyo sa mga boluntaryo gikan sa nagkalain-laing komunidad ug unibersidad nga mipili sa pagtabang imbes nga magpabilin sa ilang mga panimalay o tulunghaan.
Sumala ni Gordon, ang espiritu sa pagboluntaryo maoy nagpalig-on sa Red Cross, ug ang matag kahon sa ayuda nga ilang gipang-andam nagsilbing mensahe sa mga pamilyang naapektuhan nga dili sila nag-inusara.
Gilauman usab nga ipang-apod-apod sa PRC ang unang 2,800 ka relief boxes nga adunay bugas, mga de-lata, noodles ug kape ngadto sa mga apektadong komunidad.
Matud usab ni PRC Secretary General Dr. Gwendolyn Pang, gitagana ang mga relief pack alang sa mga pamilyang mogawas na sa evacuation centers ug mobalik sa ilang mga panimalay, aron adunay ilang magamit nga pagkaon samtang naglimpyo ug naghan-ay pag-usab sa ilang mga balay.
Samtang, nagpadayon usab ang pag-apod-apod og hot meals alang sa mga apektadong residente nga nagpabilin pa sa evacuation centers.
Dugang pa niini, misuroy ang mga personnel sa PRC sa mga panimalay aron susihon ang kahimtang sa mga residente ug mahibaw-an ang ilang dugang nga mga panginahanglan.
Sa pagkakaron, kapin 11,000 ka indibidwal na ang nakadawat og hot meals, samtang kapin 14,000 ka botelya sa tubig ug liboan ka hygiene kits ang naapod-apod na, lakip na ang mga rescue operation ug pagtukod og first aid stations sa 53 ka lokasyon.
