Gipangayo ni Senador Panfilo “Ping” Lacson ang mas lawom nga pagsusi sa Commission on Audit o COA sa paggamit sa mga alyas sa mga dokumento kabahin sa confidential funds.
Matud ni Lacson, kinahanglan mahibal-an ug ma-verify sa COA ang tinuod nga identidad sa mga tawo nga migamit sa mga alyas sama nila “Mary Grace Piattos,” “Patty Ting” ug “Andy Lim” sa acknowledgment receipts.
Gipasabot sa senador nga gitugotan ang paggamit og alyas sa confidential operations, apan kinahanglan gihapon adunay pamaagi aron mapamatud-an ang tinuod nga identidad sa mga mipirma sa mga dokumento.
Iyang gipangutana usab kung giunsa pag-verify sa COA ang maong mga transaksyon kung wala niini ma-inspeksyon mismo ang secured vault diin gitipigan ang classified information ug nagsalig lamang sa paper audit.
Gibutyag usab ni Lacson ang COA Circular No. 2020-005 nga naglatid sa proseso alang sa fraud audit investigation. Matud niya, mahimo kining ipahigayon kung adunay impormasyon nga posibleng adunay nahimong fraud.
Tungod niini, gikuwestyon sa senador nganong wala nagpahigayon ang COA og fraud audit investigation bisan adunay mga impormasyon nga migawas kabahin sa confidential fund transactions.
Samtang, nagdumili si Lacson sa pagkomento sa giingong pagkiling sa pipila ka senator-judge, ug miingon nga isip miyembro sa Impeachment Court, dili niya hukman ang baruganan sa iyang mga kauban.
