Gipahayag ni Philippine Ambassador to the United States Jose Manuel Romualdez nga pipila ka mga nasod sa Asya ang andam unta nga modawat sa Pax Silica project, apan ang Pilipinas usa sa pipila ka mga nasud nga napili alang sa maong inisyatiba. Andam usab kuno modawat sa maong proyekto ang Vietnam, Malaysia ug Indonesia.
Gihangyo ni Romualdez ang publiko nga timbangon una ang mga bentaha sa US-led initiative ug economic security framework sa dili pa tutukan ang mga negatibong aspeto niini gumikan kay adunay bug-os ug lawom nga diskusyon bahin sa maong proyekto, lakip na ang mga isyu sa environmental impact.
Misaad usab ang embahador nga hisgutan ug klaruhon ang mga isyu nga nalambigit sa Pax Silica ug himuon kini nga transparent.Gihangyo usab niya ang mga lider sa politika ug mga opposition groups nga tan-awon una ang mga bentaha sa Pax Silica sa dili pa mopadayon sa pagsaway sa maong proyekto. Ang Pax Silica usa ka US-led initiative ug economic security framework nga nagtumong sa paghimo og global supply chain alang sa artificial intelligence (AI) ug semiconductor industry, diin lakip ang Pilipinas sa 24 ka mga nasod ang mipirma sa maong kasabotan.
Giplano usab isip kabahin sa Pax Silica project ang usa ka 1,600-hectare nga industrial hub nga naka-focus sa AI sa New Clark City sa Tarlac. Bisan pa sa mga pagsaway batok sa proyekto, gipasiugda sa gobyerno nga dili lamang paghimo og AI hubs ang tumong niini, kondili ang pagpalig-on usab sa high-value manufacturing sa Pilipinas.
