Giduso ni Parañaque 2nd District Representative Brian Yamsuan ang House Bill 7868 nga nagtumong sa paghimo og malungtarong plano aron masulbad ang kakulang sa mga libro sa pampublikong eskwelahan ug masiguro nga ang mga learning materials hapsay, bag-o, ug angay sa panginahanglan sa mga estudyante.
Gisugyot sa maong lagda nga magtinabangay ang Department of Education (DepEd) ug National Book Development Board (NBDB) sa paghimo sa National Textbook and Learning Resources Plan nga maglatid og mga polisiya aron masiguro ang igong suplay sa mga libro ug regular nga pagrepaso niini matag lima ka tuig.
Gipasiugda ni Rep. Yamsuan ang pagpalapad sa pag-imprenta sa mga libro sa regional level aron mapalig-on ang produksyon sa Visayas ug Mindanao. Giapil sa maong sugyot ang hinay-hinay nga pagbalhin ngadto sa pribadong sektor sa pagpatik ug pag-apod-apod sa mga learning materials sulod sa tulo ka tuig samtang bantayan kini sa NBDB.
Giila usab ang electronic publications isip libro;paghimo og mga materyales alang sa mga estudyanteng PWD ug adunay espesyal nga panginahanglan; lakip na usab ang pagtukod og Textbook Review Committees aron masiguro ang kalidad;ug pagkaangay sa mga gamiton nga libro sa mga pampublikong mga tulunghaan.
Gipadayag niini ang importansya sa pagbaton og igo ug dekalidad nga mga libro aron mapalambo ang abilidad sa pagbasa sa mga estudyante ug matubag ang dugay nang problema sa kakulang sa learning materials sa pampublikong eskwelahan sa Pilipinas.
