Gipklaro ni Senador Robin Padilla nga ang iyang wala pagtambong sa ikalimang State of the Nation Address ni Pangulong Ferdinand Marcos Jr. dili nagpasabot nga wala siyay pagtahod sa Pangulo.
Sa iyang social media post, gilimod ni Padilla ang mga nagkatag nga haka-haka nga gituyo niyang bastuson ang Pangulo pinaagi sa dili pagtambong sa SONA.
Matod sa senador, bisan pa og kabahin siya sa oposisyon, nagpabilin ang iyang pagtahod kang Pangulong Marcos nga iyang giila usab nga personal nga higala.
Gipasabot usab niini nga gipili niyang dili motambong aron malikayan ang pagsubli sa nahitabo kaniadtong 2024 diin nabantayan ang iyang kakulang sa reaksyon samtang nagpakpak ug mihatag og pagdayeg ang ubang mga nanambong sa pamulong sa Pangulo.
Dugang pa niya, ang SONA maoy adlaw sa Pangulo sa pagreport ngadto sa katawhang Pilipino, busa mas maayong dili na lang siya motambong isip pagpakita sa iyang pagtahod sa maong okasyon ug sa ilang personal nga panaghigalaay.
Gawas kang Padilla, wala usab motambong sa SONA ang pipila ka mga senador susama nila Senador Alan Peter Cayetano, Imee Marcos, Pia Cayetano, Loren Legarda, Mark Villar ug Bong Go.
