Gituohan sa Philippine Eagle Foundation nga gipusil ug posibleng gigapos una ang critically endangered Philippine Eagle nga si “Sawaga-Dalwangan” sa wala pa kini maluwas, base sa mga nakit-an sa veterinary examination.
Sa X-ray, nakaplagan ang duha ka airgun pellets nga naigo sa tuo niyang pako ug wala nga paa. Natangtang ang pellet sa pako, apan nagpabiling naa sa kaunoran sa iyang paa ang usa ka pellet tungod kay delikado na kining kuhaon.
Matud ni PEF veterinary consultant Dr. Bayani Vandenbroeck, adunay mga samad, ulod sa samad, hugaw sa ubos nga bahin sa lawas ug mga timailhan sa pisi sa mga tiil sa agila, nga nagpakita nga posible kining gigapos ug napugngan sa pagkalupad sulod sa pipila ka panahon.
Gipasabot usab niya nga walay ebidensya nga giatake kini sa unggoy, ug ang duha ka airgun pellets nagpakita nga gipusil ang agila sa labing menos duha ka higayon.
Sa laing bahin, namatay si Sawaga-Dalwangan atol sa rehabilitasyon, apan padayon pa ang laboratory tests aron matino ang eksaktong hinungdan sa iyang kamatayon. Sumala sa Philippine Eagle Foundation, ubos na lang sa 400 ka breeding pairs sa Philippine Eagle ang nahibilin sa lasang sa nasod.
