Magpahigayon ang Senate Committee on Social Justice, Welfare, and Rural Development og lawom nga pagtuon sa Juvenile Justice and Welfare Act aron masusi ang kasamtangang pagpatuman niini sa nasod. Sumala pa kang committee chairman nga si Senador Erwin Tulfo, lakip sa ilang pagatun-an ang kakulang sa Bahay Pag-asa facilities alang sa mga Children in Conflict with the Law o CICL, ingon man ang posibilidad nga mahimong adunay legal nga responsibilidad ang mga ginikanan sa mga paglapas nga mahimo sa ilang mga anak.
Dugang pa niini, susihon usab sa komite kon ang minimum age of criminal responsibility nga anaa karon sa 15 anyos angay pa bang ipadayon o kinahanglan nang usbon. Kahinumduman, gipadayag ni Tulfo nga bisan sa wala pa siya misulod sa serbisyo publiko, nasaksihan na niini ang mga kaso diin ang mga biktima sa krimen nga gihimo sa mga menor de edad walay nahimo tungod sa kasamtangang pagpatuman sa balaod.
Lakip sa mga konsultahon sa komite ang mga legal experts, law enforcement agencies, social welfare groups, mga lider sa simbahan, medical professionals, ug mga ginikanan aron makakuha og nagkalain-laing opinyon ug rekomendasyon.Sa kasamtangan, gipasiugda ni Tulfo nga tumong sa komite ang pagpalig-on sa implementasyon sa balaod aron mabalanse ang paghatag og hustisya sa mga biktima ug ang tinuod nga rehabilitasyon sa mga menor de edad nga nakalapas sa balaod.
