Nasakmit sa mga operatiba sa anti-iligal nga droga ang kapin P2.4 milyon nga kantidad sa gituohang shabu atol sa usa ka buy-bust operation nga gipahigayon sa Purok Bayanihan, Barangay Sainz, Mati City, Davao Oriental, Hunyo 16, 2026.Nasayran nga ang operasyon gipangunahan sa mga operatiba sa Philippine Drug Enforcement Agency Regional Office XI pinaagi sa Davao Oriental Provincial Office, sa pakigtambayayong sa Mati City Police Station.
Gidakop sa mga awtoridad ang suspek nga giila lamang sa alyas nga “Jinky,” 45 anyos, human kini nakabaligya og usa ka sachet sa gituohang shabu nga nagkantidad og P1,000 ngadto sa usa ka poseur-buyer nga sakop sa PDEA. Sumala pa sa mga awtoridad, dugang nga lima ka plastic sachet nga adunay sulod nga gituohang shabu nga adunay kinatibuk-ang gibug-aton nga mokabat sa 360 gramos ang narekober gikan sa suspek atol sa operasyon.
Lakip sa nasakmit ang nagkalain-laing drug paraphernalia ug ang gimarkahang buy-bust money nga gigamit sa operasyon.Dugang pa, gibanabana sa mga awtoridad nga mokabat sa P2,448,000 ang kantidad sa tanang gituohang ilegal nga droga nga ilang narekober gikan sa suspek.
Sa pagkakaron, anaa na sa kustodiya sa mga awtoridad ang nadakpang suspek samtang gipailalom sa hustong dokumentasyon ug legal nga proseso ang mga ebidensya nga nakuha atol sa operasyon.Sa kasamtangan, giandam na sa mga otoridad ang pagsang-at og kaso batok sa suspek tungod sa paglapas sa Republic Act No. 9165 o ang Comprehensive Dangerous Drugs Act of 2002.
Nagpadayon usab ang imbestigasyon sa mga otoridad aron masuta kung adunay lain pang mga indibidwal nga nalambigit sa ilegal nga kalihokan sa droga sa maong lugar.
