Pormal nang ablihan karong adlawa ang 20th Asian Games sa Nagoya, Japan, diin kapin 11,000 ka atleta gikan sa 45 ka nasod ug teritoryo ang gikatakdang makig-indigay sa nagkalain-laing sports.
Gikatakdang sugdan ang opening ceremony alas-6 sa gabii karong Sabado, Septiyembre 19, oras sa Pilipinas, alang sa opisyal nga pagsugod sa duha ka semana nga kompetisyon. Gikanayon usab
ni Nagoya Mayor Ichiro Hirosawa, nga deputy president usab sa Asian Games, nga nahimong hagit sa organizers ang pag-ulan ug pag-agi sa mga bagyo samtang nag-andam alang sa maong kalihukan.
Sumala pa ni Hirosawa, nakaapekto sa ilang pagpangandam ang kusog nga bagyo nga miagi sa Japan sa miaging mga semana, samtang gipaabot usab ang laing bagyo nga moabot sa nasod. Gipili usab sa organizers ang cost-cutting measures, diin wala na ipadayon ang unang plano nga magtukod og athlete’s village ug gigamit na lamang ang container housing, cruise ship ug mga hotel alang sa kapuy-an sa mga atleta.
Bisan pa niini, giangkon ni Hirosawa nga misaka gihapon ang kinatibuk-ang gastusin sa pagdumala sa Asian Games.Gipahugtan usab ang seguridad sa palibot sa mga venue, diin kapin 10,000 ka mga kapulisan ang gipakatag aron magbantay sa mga atleta, opisyal ug mga bisita.
Lakip sa 43 ka sports nga pagkompetisyunan ang boxing, cricket, football, golf, gymnastics, table tennis, weightlifting, tennis ug badminton.Dugang pa niini, gilakip ang eSports, break dancing ug BMX biking aron madugangan ang interes sa mga kabatan-onan sa maong kompetisyon.
Sa kinatibuk-an, mokabat sa 11,000 ka atleta ug 6,000 ka opisyal gikan sa 45 ka nasod ug teritoryo ang moapil sa 20th Asian Games. Dili usab motambong sa opening ceremony si Japanese Prime Minister Sanae Takaichi.
Sa kasamtangan, nakaandam na ang Nagoya alang sa pag-abli sa maong internasyonal nga sporting event samtang gisiguro sa organizers ang seguridad ug kahapsay sa mga kalihukan.
