Hugot karon ang gihimong pagmonitor sa kapulisan human nga nagpaguwa og kamanduan ang LGU sa munisipalidad sa Talaingod, Davao Del Norte ngadto sa publiko kabahin sa duha ka mga baranggay nga apektado sa Pangayaw.
Subay sa gipaguwa nga Memorandum Order ni Mayor Jonnie Libayao gipasidan-an ang publiko nga likayan una ang pagbyahe sa maong mga lugar samtang wala pa nadeklara nga luwas ang maong mga dapit.
Sumala pa sa LGU, adunay duha ka mga Barangay sa Talaingod, Davao del Norte ang apektado sa hulga sa “pangayaw”.
Gumikan niini, gisuspende ang klase kagabahon sa hapon. Sumala sa LGU nga ang duha ka mga baranggay nga apektado mao ang Brgy. Palma Gil nga kini gilangkuban sa Sambulongan, Nalubas, ug Natulinan. Samtang sa Brgy. Dagohoy, apektado ang mga lugar sa Peroy, Km.31, B, Bato, Badyatan Lumondong, Pong-Pong ug Lumbayan.
Samtang kabahin usab niini, ang LGU nagpasalig nga paningkamutan niini nga maresolba ang panagbangi alang kalinaw og kaluwasan sa maong lugar, pagpamatuod niini, gitapok sa LGU ang mga Tribal Leader alang sa coordination meeting kabahin sa maong isyu.
Kahinumduman nga una nang gilimod sa kapulisan sa Davao Del Norte kabahin sa unang mikatag sa social media mahitungod sa gikaingong Pangayaw.
