Mipasiugda sa mas lig-on nga panag-uban tali sa kapulisan ug Muslim community ang Davao City Police Office human aktibong mitambong ang ilang pamunuan sa pag-abli sa Barangay Waan Multipurpose Gym sa dakbayan sa Davao.
Atol sa maong kalihokan, gipangulohan ni DCPO Acting City Director Police Colonel Mannan C. Muarip, uban si Police Major Rejie G. Torrita, Station Commander sa Police Station 13–Mandug, ang representasyon sa kapulisan isip timaan sa ilang suporta sa mga inisyatiba sa komunidad. Mainitong pagdawat ang ilang naangkon gikan kang Barangay Chairman Jaynor N. Macadawan ug sa mga residente nga mitambong sa okasyon.
Sumala kang PCol. Muarip, ang pag-abli sa multipurpose gym dili lang bahin sa imprastraktura, kondili simbolo sa mas lawom nga panaghiusa ug kooperasyon tali sa lokal nga panggamhanan, kapulisan, ug Muslim community. Iyang gipahayag nga ang maong pasilidad mahimong sentro sa mga kalihokan nga magpalig-on sa sosyal nga panag-uban, disiplina, ug aktibong partisipasyon sa katawhan.
Gidugang pa niya nga pinaagi sa ingon ani nga mga kalihokan, mas mapalambo ang pagsinabtanay ug pagsalig tali sa kapulisan ug komunidad, nga importante sa pagmintinar sa kalinaw ug kahapsay sa syudad. Ang presensya sa DCPO sa maong okasyon nagpakita sa ilang commitment sa community-based policing ug sa paghatag bili sa kultura ug identidad sa Muslim community sa Davao City.
Sa kinatibuk-an, gilauman nga ang mas lig-on nga partnership tali sa DCPO ug sa komunidad magdala og mas malinaw, luwas, ug progresibong palibot, diin ang katawhan ug kapulisan magtinabangay alang sa kaayohan sa tibuok syudad.
