Nangayo ang House Committee on Agriculture and Food og dugang nga pondo alang sa Department of Agriculture o DA tungod sa padayong hulga sa El Niño ug uban pang hagit nga giatubang sa sektor sa agrikultura.
Gihisgutan ang maong sugyot atol sa Budget and Review Subcommittee sa Mababang Kapulungan, diin gikonsiderar ang panginahanglan sa mga mag-uuma ug mangingisda ilabina sa epekto sa taas nga gasto sa produksyon.
Lakip sa gikonsiderar ang padayong pagsaka sa presyo sa mga produktong petrolyo, nga dakong gasto sa mga mag-uuma ug mangingisda alang sa ilang adlaw-adlaw nga operasyon.
Alang sa food security, gipasiugda ni House Committee on Agriculture and Food Chairperson Rep. Mark Enverga ang National Rice Program sa gobyerno aron masuportahan ang mga apektadong sektor ug mapadayon ang igo nga suplay sa bugas ug uban pang pagkaon sa nasod.
Kabahin usab sa gisulong nga suporta ang padayon nga fertilizer assistance alang sa mga mag-uuma aron makatabang sa ilang pagbangon gikan sa mga nadaot ug nawad-an og ani, ingon man sa pagpataas pag-usab sa produksyon.
Gipunting usab ang pagpalig-on sa cold storage facilities aron mapreserbar ang mga ani, ilabina ang high-value crops nga dali madaot tungod sa taas nga temperatura.
Samtang, giila usab sa komite ang posibleng kakulang sa tubig tungod sa grabeng kauhaw. Tungod niini, gisuportahan ang mas lapad nga pag-instalar sa solar pump irrigation systems sa mga umahan.
Gihatagan usab og pagtagad ang dali nga rehabilitasyon sa mga kasamtangang irrigation system, diin mas gipaboran ang pag-ayo sa mga naglungtad nang pasilidad kaysa maghimo pa og bag-ong imprastraktura aron mas paspas nga mabalik ang suplay sa tubig sa mga umahan.
Dugang pa, apil sa prayoridad ang sektor sa livestock pinaagi sa Animal Competitiveness Enhancement Fund o AnCEF, nga adunay kapin P20 bilyon nga pondo alang sa modernisasyon ug repopulation sa livestock ug poultry industry.
Sa kinatibuk-an, tumong sa mga lakang nga mapalig-on ang produksyon sa pagkaon, maprotektahan ang panginabuhian sa mga mag-uuma ug mangingisda, ug maandam ang sektor sa posibleng mas grabeng epekto sa El Niño ug uban pang hagit sa agrikultura.
