Mikabat sa kapin ₱17.5 milyones ang natigom nga multa sa Vices Regulation Unit (VRU) sa City Government of Davao sulod sa tuig 2025, human sa padayong pagpatuman sa Anti-Smoking Ordinance ug Liquor Ban sa dakbayan, mas taas kini kumpara sa natala sa miaging tuig.
Base sa datos sa VRU, misaka pag-ayo ang gidaghanon sa mga na-aresto tungod sa pagpanigarilyo sa ginadili nga lugar ug paglapas sa liquor ban. Kapin sa napulo ka libo ka indibidwal ang nasakpan sa anti-smoking violations, samtang labaw tulo ka libo ang na-issuehan og citation tungod sa paglapas sa liquor ban, numero nga mas dako kon itandi sa 2024.
Matod sa pamunuan sa VRU, ang pagsaka sa koleksyon ug apprehension dili pasabot nga nidaghan ang mga malapason, kondili nagpakita sa mas istriktong pagmonitor sa pampublikong lugar, establisemento, ug mga komunidad. Gipakusgan sa yunit ang ilang presensya aron masiguro nga nasunod ang mga ordinansa nga gitumong sa pagpanalipod sa kahimsog ug kalinaw sa katawhan.
Gihatagan usab og gibug-aton sa VRU ang padayong kampanya sa pagdisiplina sa publiko, ilabi na sa mga lugar nga kanunay tapukan sa katawhan. Ang regular nga operasyon ug surprise inspections maoy giila nga hinungdan sa mas epektibong pagpatuman sa balaod.
Sa ilawom sa balaod sa syudad, ang matag indibidwal nga masakpan sa paglapas sa Anti-Smoking Ordinance ug Liquor Ban silotan og ₱3,000 nga multa. Mas bug-at ang silot sa mga establisemento nga masakpan nga namaligya og sigarilyo o ilimnong makahubog ngadto sa mga menor de edad, diin ₱5,000 ang multa sa unang paglapas.
Padayon nga gipahimangnoan sa VRU ang mga Dabawenyo nga magpabiling matinumanon sa balaod, samtang gidasig ang mga negosyante ug residente nga motabang sa pagmintinar sa limpyo, luwas, ug disiplina nga palibot sa tibuok syudad.
