Nakasulod na sa Philippine Area of Responsibility o PAR alas 7:00 karong buntaga, Septyembre 24, 2026 ang bagyong “Surigae”, nga gihatagan sa Philippine Atmospheric, Geophysical and Astronomical Services Administration og lokal nga ngalan nga “Queenie.”
Ang sentro sa bagyo nahimutang sa gibana-banang 1,500 kilometro sa sidlakang bahin sa Northern Luzon, nga adunay kusog sa hangin nga moabot sa 75 kilometro kada oras ug paghaguros nga hangtod 90 kilometro kada oras.
Nagpadayon kini sa paglihok paingon sa west-northwest sa gikusgon nga 30 kilometro kada oras, samtang padayon nga gimonitor sa mga awtoridad ang posibleng pag-usab sa direksyon niini.
Bisan layo pa sa kayutaan, nagsugod na usab ang trough o extension sa Tropical Storm Queenie sa pagdala og mga pag-ulan sa sidlakang Visayas ug Mindanao.
Gipahinumdoman ang mga residente sa mga lugar nga mahimong maapektuhan nga magpadayon sa pag monitor sa mga update ug pahimangno sa PAGASA.
