Nadakpan ang usa ka incumbent nga barangay captain ug ang usa ka Brgy.tanod atol sa usa ka buy-bust operation nga gipahigayon sa mga operatiba sa Davao del Sur Provincial Office sa Philippine Drug Enforcement Agency (PDEA) Regional Office 11, kauban ang Regional Drug Enforcement Unit ug ang Sulop Municipal Police Station.
Sumala sa report sa mga otoridad, gilusad ang operasyon niadtong Lunes, pasado alas 10:00 sa gabii, sa Purok 7, Barangay Roxas, Sulop davao Del Sur.
Giila ang dinakpan nga barangay captain, nga Reynaldo Vargas si alyas “Kap”, 36 anyos, gikonsidera nga High Value Target diin nadakpan human nga nagbaligya og usa ka heat-sealed transparent plastic sachet nga gituohang shabu nga nagkantidad og ₱8,000 ngadto sa usa ka PDEA operative nga nagsilbing poseur-buyer.
Samtang ang iyang kauban, nga nailhan si Dionesio Dela Torre sa alyas nga “Diony”, nadakpan usab atol sa operasyon.
Samtang gipahigayon ang pagrekisa sa mga otoridad, nakumpiska pa gikan sa mga suspetsado ang dugang upat (4) ka heat-sealed transparent plastic sachets nga gituohang shabu nga adunay gibug-aton nga 23 gramos, nga gibana-banaan nga adunay nga street value nga ₱156,400.
Narekober usab sa mga otoridad ang marked buy-bust money ug cellphone nga gigamit sa trasaksyon.
Sa pagkakaron, ang mga nadakpan anaa na sa kostudiya sa PDEA Regional Office 11 ug andam na nga pasakahan og kaso sa korte kabahin sa pagsupak sa Section 5 (Sale of Dangerous Drugs) ug Section 11 (Possession of Dangerous Drugs), Article II sa Republic Act No. 9165, kon Comprehensive Dangerous Drugs Act of 2002.
