Nanawagan si Pangulo Ferdinand Marcos Jr. uban ang Department of Budget and Management (DBM) nga gipangulohan ni Secretary Amenah Pangandaman, sa tanan nga ahensya sa gobyerno nga pagasimplihon ug himuong makahuluganon ang pagselebrar sa Christmas ug Year-End celebrations karong tuiga.
Kini nga panawagan gisunod sa sunod-sunod nga mga kalamidad nga miigo sa nasud.
Sumala sa Presidente, kini nga lakang usa ka pamaagi sa pakig-uban sa gobyerno sa mga Pilipino nga padayon nga nag-antos ug nagbangon gikan sa mga kalisdanan nga gidala sa mga bag-ong kalamidad, lakip na ang kusog nga mga linog sa Visayas ug Mindanao, ug ang mga bagyo nga miigo sa lain-laing bahin sa nasud.
Gipahinumdoman usab ni Pangulo Marcos Jr. ang mga empleyado sa gobyerno nga labing importante ang espiritu sa pagtinabangay, paghatag, ug pagmalasakit sa isigkatawo, labi na sa mga pamilyang padayon nga nagabangon gikan sa kadaot nga gidala sa mga kalamidad.
Dugang pa sa DBM, ang simpleng pagselebrar usa usab ka paagi aron masiguro nga magamit sa hustong paagi ug may katuyoan ang pondo sa gobyerno, subay sa prinsipyo sa matipid, responsable, ug makataong pamunoan.
Kini nga panawagan kabahin sa tinguha sa administrasyong Marcos nga isulong ang “Bagong Pilipinas” usa ka gobyernong inklusibo, may malasakit, ug tinuod nga nag-atiman sa kapakanan sa matag Pilipinong mamamayan.
