Gidakop ang usa ka 50 anyos nga pasahero sa Ninoy Aquino International Airport (NAIA) Terminal 1 niadtong Martes, Nobyembre 10, human kini giingong nagbinuang bahin sa bomba.
Sumala sa PNP Aviation Security Group (PNP-AVSECG), padulong unta sa Hong Kong ang pasahero dihang gihisgotan niini ang bomba samtang gipatin-aw sa usa ka kawani sa serbisyo sa pasahero sa eroplano ang mga pagdili sa pagdala sa mga delikadong butang ug elektronikong kagamitan.
Matod sa kapulisan, miingon kuno ang lalaki og, “Bomba, may bomba yan,” nga maoy hinungdan sa pagpahigayon og imbestigasyon sa mga awtoridad, kauban ang Explosive Ordnance Disposal (EOD) team.
Bisan pa nga walay nakit-ang eksplosibo o mga materyales sa iyang bagahe atol sa pagsusi nga mahimong hinungdan sa maong insidente , gidakop gihapon siya sa mga pulis ug gidala dayon sa NAIA Police Station 1.
Ginaandam na usab sa mga awtoridad ang angay nga kasong ipasaka batok sa pasahero tungod sa giingong paglapas niini sa Presidential Decree No. 1727 o Anti-Bomb Joke Law.
