Mokabat na sa kapin 40 ka mga tawo ang namatay ug gatusan ang mga naangol tungod sa pagkuso-kuso sa bagyong Tino sa Visayas region kagahapong adlawa.
Samtang libuan usab ang mga nanghikling gikan sa ilang mga balay tungod sa pagbaha nga dala sa bagyo nga adunay international name: Kalmaegi.
Subay sa datos sa Office of Civil Defence ug ni provincial information officer nga si Ainjeliz Orong, adunay 39 ang ihap sa mga kumpirmadong namatay sa probinsya sa Cebu namatay samtang sa ubang mga probinsya, labing menos lima pa natalang patay, lakip na ang usa ka tigulang nga naanod sa ikaduhang andana sa ilahang balay sa probinsya sa Leyte, ug usa ka lalaki nga natumbahan sa kahoy sa Bohol.
Gumikan sa kusog nga bundak sa kusog nga ulan sa tibuok sentrong bahin sa Visayas nalunupan ang mga panimalay nga anaa daplin sa sapa ingon man sa mga ubos nga lugar.
Niabot pa sa ikaduhang andana ang tubig baha nga hinungdan nga pagsaka sa atop sa mga residente.
Daghan usab ang mga sakyanan ang nanga-anod gumikan sa kusog ug lawom nga pagbaha ug nagpatong-patong kini atol sa paghubas sa baha.
Makita ang mga sakyanan, trak, ug bisan dagkong shipping container nga nadala sa baha nga adunay lapok.
Sa pagkakaron, ang probinsya sa Cebu, mideklara na og State of Calamity gumikan sa maong panghitabo.
