Nagpahigayon og libreng legal assistance program ang Office of the Vice President (OVP) alang sa mga Persons Deprived of Liberty (PDLs) sa Bureau of Jail Management and Penology (BJMP) Metro Bacolod District Jail sa Barangay Handumanan, Bacolod City, isip kabahin sa pagsaulog sa ika-91 nga anibersaryo sa maong opisina.
Sa pakighinabi sa Bombo Radyo, gikumpirma ni OVP Western Visayas Satellite Manager Dr. Chris Sorongon nga katumanan kini sa saad ni Vice President Sara Duterte atol sa personal niyang pagbisita sa maong prisohan duha ka tuig na ang milabay.
Lakip sa serbisyo ang libreng konsultasyon legal, tabang sa pagproseso sa mga dokumento, pagpasabot sa mga katungod sa mga PDL ug pag-refer kanila sa tukmang ahensya.
Gisuportahan ang programa sa Public Attorney’s Office (PAO)-Bacolod, BJMP, UNO-R College of Law ug mga boluntaryong abogado.
Dugang niini, nagpahigayon usab og pagsusi sa presyon sa dugo ug blood sugar ang mga nurse, lakip ang libreng eye check-up ug paghatag og reading glasses gikan sa mga optical clinic.
Una nang mibisita si Vice President Sara Duterte sa Sara Central Elementary School sa Iloilo City kaniadtong miaging adlaw alang sa pagsaulog sa Book Month, diin nanghata siya og mga bag ug school supplies ug miapil sa tree-planting activity sa wala pa mipadulong sa Bacolod City.
Gilauman usab nga mobisita ang Bise Presidente sa pipila ka eskwelahan sa Bacolod karong adlawa alang sa mga kalihokan sa mga estudyante.
Matod ni Sorongon, ipadayon sa OVP ang mga programa nga nagtumong sa paghatod sa serbisyo ngadto sa nagkalainlaing sektor sa katawhan.
