Nakakuha ang Pilipinas og duha ka kasabutan sa negosyo nga nagkantidad og USD27 milyon uban sa Chinese company nga Somago atol sa ika-9 nga China International Import Expo (CIIE) 2026, nga mag-abli og mas dagkong oportunidad alang sa mga prodyuser sa durian sa Davao.
Gipirmahan ang mga kasabutan alang sa strategic cooperation ug frozen durian procurement tali sa Somago ug sa mga kompanyang Eng Seng Food Products ug Maylong Enterprises Corp.
Tumong niini nga palig-onon ang komersyal nga relasyon ug makapagawas sa dekalidad nga durian ngadto sa merkado sa China gikan Nobyembre 2026 hangtod Oktubre 2027.
Matod ni Agriculture Assistant Secretary Genevieve Velicaria-Guevarra, pamatuod kini sa paningkamot sa gobyerno nga himuong aktuwal nga mga kasabutan ang mga oportunidad aron matabangan ang lokal nga mga mag-uuma ug mapalapdan ang merkado sa nasud.
Gidugang usab ni Agriculture Secretary Francisco P. Tiu Laurel Jr. nga dako ang ikatabang niini sa pagpausbaw sa kita sa mga mag-uuma ug pagpalig-on sa posisyon sa agrikultura sa Pilipinas sa internasyonal nga patigayon.
Naglangkob sa 30 ka exhibitors ang delegasyon sa Pilipinas nga nagpasiugda sa mga produkto sama sa preskong durian, saging ug uban pang mga produkto isip pagpadayon sa malampusong partisipasyon sa nasud sa nangaging mga expo.
