Kumpiyansa ang Philippine National Police (PNP) nga matultolan ug madakpan sa dili madugay si Senador Ronald “Bato” dela Rosa bisan pa sa padayon niyang paglikay sa mga otoridad. Matod ni PNP Chief General Jose Melencio Nartatez Jr., dili hangtod sa hangtod makatago ang usa ka tawo nga gipangita sa balaod, ilabina kay nagkagamay na kuno ang mga lugar nga mahimo niyang adtoan.
Naglaum si Nartatez nga sa dili madugay ilang matino ang nahimutangan sa senador samtang nagpadayon ang pagpangita aron mapatuman ang mando sa pagdakop batok niini. Gipaniguro usab sa hepe sa kapulisan nga wala mohunong ang ilang pagpangita ug padayon ang ilang pakig-alayon sa ubang mga ahensyang nagpatuman sa balaod, ilabina sa mga yunit nga nagdumala sa pagpangusisa sa mga tinubdan sa kasayoran.
Dugang pa niya, nagpadayon ang pagpangita adlaw ug gabii aron masusi ug maaksyunan ang matag kasayoran nga mahimong makatabang sa pagtino sa nahimutangan ni Dela Rosa. Kahinumduman nga una nang gibutyag ni Nartatez nga nakadawat na ang kapulisan og dili moubos sa 500 ka kasayoran kalabot sa posibleng nahimutangan sa senador.
Apan, dili lamang nila dawaton dayon ang maong mga kasayoran kay gipailalom una kini sa pagsusi ug pagpamatuod, nga gisundan sa aktuwal nga pagpangita sa mga lugar nga gitumbok.
Nag-atubang si Dela Rosa sa mando sa pagdakop nga giisyu sa International Criminal Court (ICC) kalabot sa kasong mga krimen batok sa katawhan nga may kalabotan sa kampanya batok sa ilegal nga droga atol sa administrasyon ni kanhi Presidente Rodrigo Duterte.
