Nagpadayon sa pagpangilog sa kinabuhi ang makalilisang nga pagbaha ug rekord nga ulan nga miigo sa sentrong bahin sa Vietnam karong semanaha, diin 35 ka katawhan ang namatay ug lima pa ang wala gihapon makit-i, base sa report sa Vietnam Disaster and Dyke Management Authority (VDDMA).
Mihugot ang pagbunok sa ulan sukad pa niadtong weekend, diin abot sa 1.7 metros ang gidak-on sa ulan nga nahulog sulod lamang sa 24 ka oras gikan Dominggo hangtod Lunes, ang labing grabe nga natala sa maong rehiyon.
Gipamatud-an sa VDDMA nga ang mga biktima nangamatay sa mga probinsya sa Hue, Da Nang, Lam Dong, ug Quang Tri. Sa lungsod sa Hoi An, nga usa ka UNESCO World Heritage Site, gilumos sa tubig nga abot hawak ang tibuok siyudad human moapaw ang suba sa labing taas nga lebel sa milabayng 60 ka tuig.
Nasayran usab nga kapin sa 16,500 ka balay ang gilunopan, samtang 40,000 ka mananap ug hayop ang nadala sa baha ug 5,300 ka ektarya sa tanom ang nalunod. Mas sayo pa karong semanaha, miabot pa sa 100,000 ka panimalay ang naapektuhan sa lunop ug 150 ka landslide ang natala.
Gipasabot sa mga siyentista nga ang climate change tungod sa kalihokan sa tawo maoy hinungdan sa mas makamatay ug makaguba nga mga bagyo ug baha. Ang Vietnam usa sa mga rehiyon sa kalibutan nga pirming maigo sa tropical cyclones, nga kasagaran magdala og grabe nga ulan gikan Hunyo hangtod Septyembre.
Karong tuiga, 12 na ka bagyo o tropical storm ang miigo sa Vietnam, sobra sa kasagaran nga 10 matag tuig. Sa unang siyam ka bulan palang, 187 ka tawo na ang patay o missing tungod sa natural nga kalamidad, ug $610 milyon ang kinatibuk-ang kadaot sa ekonomiya, sumala sa gobyerno.
