Gilaglag sa Philippine Drug Enforcement Agency o PDEA XI ang nagkantidad og 14,082,162.72 pesos nga nakumpiskang ilegal nga droga gikan sa Regions XI ug XII atol sa drug incineration activity sa Davao City niadtong Nobyembre 18, 2026.
Gipahigayon ang kalihokan pasado alas 9:00 sa buntag sa Cosmopolitan Funeral Homes, J. Camus Extension corner Jose Abad Santos Street, isip kabahin sa Drug Abuse Prevention and Control Week 2026.
Gikan sa Region XI, gilaglag ang kapin 1,237 gramos nga shabu nga nagkantidad og 8.4 milyones pesos, kapin 24,558 gramos nga marijuana nga nagkantidad og 2.9 milyones pesos, 10 ka tanom sa marijuana, ecstasy ug uban pang delikadong droga lakip ang mga expired nga tambal.
Samtang, gikan sa Region XII ang kapin 326 gramos nga shabu nga nagkantidad og 2.2 milyones pesos, kapin 102 gramos nga marijuana ug uban pang delikadong droga ug expired nga tambal.
Gipangulohan ang kalihokan ni PDEA XI Director Atty. Benjamin G. Gaspi, uban sa mga representante sa nagkalainlaing ahensya sa gobyerno ug civil society organizations nga mitan-aw sa paglaglag sa mga ebidensya.
Matud ni Gaspi, dili matapos sa pagdakop sa mga nalambigit sa ilegal nga droga ang kampanya batok niini, kay importante usab nga masiguro ang hustong pagdumala ug paglaglag sa tanang nakumpiskang droga subay sa balaod.











