Padayon ang pagtaas sa cash remittances gikan sa mga Overseas Filipino Workers (OFWs), nga miabot og US$2.98 bilyon niadtong Agosto 2025, mas taas kini og 3.2% ku ng itandi sa US$2.89 bilyon niadtong Agosto 2024.
Ang mga land-based OFWs ang nakadugang og US$2.35 bilyon, samtang ang sea-based workers nakahatag og US$626 milyon.
Sa kinatibuk-an, gikan Enero hangtod Agosto 2025, mitubo ang remittances ngadto sa US$22.91 bilyon gikan sa US$22.22 bilyon sa miaging tuig.
Nagpabilin nga nag-una nga tinubdan sa remittances ang Estados Unidos, gisundan sa Singapore ug Saudi Arabia.
Tungod sa pagsaka sa cash remittances, nisaka usab ang personal remittances ngadto sa US$3.31 bilyon gikan sa US$3.20 bilyon niadtong Agosto 2024.
Sa tibuok rekord, ang personal remittances gikan Enero hangtod Agosto 2025 nakaabot na og US$25.51 bilyon, mas taas kini og 3.1% kung itandi sa susama nga panahon sa 2024.
