Wala pa gayud motubag si kanhing Philippine Charity Sweepstakes Office (PCSO) General Manager Royina Garma sa mga paningkamot sa National Bureau of Investigation (NBI) nga mokontak kaniya.
Kini nasayran human sa pormal nga hangyo sa NBI sa International Criminal Police Organization (Interpol) nga magpagawas og red notice batok kang Garma, nga giingong nalambigit sa pagpatay kang kanhing PCSO Board Secretary Wesley Barayuga.
Sumala ni NBI Director Jaime Santiago, gitawagan na sa iyang opisina ang numero nga gibilin ni Garma sukad pa niadtong milabay nga mga semana sa dihang miadto siya sa Malaysia, aron makigkita sa pipila ka opisyal sa International Criminal Court (ICC).
Apan bisan pa man niini, wala gihapon kini mitubag.
Ang ilang natiman-an nga kausaban, matod pa ni Santiago, mao nga naa na’y signal ug nag-ring na ang numero, nga kaniadto dili gayud matawagan.
Sa sinugdanan, misaad pa kuno si Garma nga mobalik siya sa Pilipinas kung ipagawas na ang warrant of arrest batok kaniya.
Apan hangtod karon, wala gihapon siya mobalik, bisan pa man nga gipagawas na sa Branch 279 sa Mandaluyong Regional Trial Court ang warrant.
Subay sa nakuha nga impormasyon nga nakuha sa NBI, nagpabilin pa sa Malaysia si Garma, kauban ang usa sa iyang mga ig-agaw.
Nasayran nga gikan sa pagkagawas sa arrest warrant, gikansela na usab ang iyang pasaporte.
