Mibusikad ang Krasheninnikov Volcano sa rehiyon sa Kamchatka Peninsula, Russia, human sa kapin 600 ka tuig na nga nakalabay, base sa gipagawas nga impormasyon sa mga siyentipiko.
Gituohan nga ang pagbusikad sa maong bulkan maoy adunay kalabutan sa kusog nga linog nga miigo sa sidlakang bahin sa Russia niadtong nakalabayng semana, nga miresulta sa mga hulga sa tsunami hangtod sa French Polynesia ug Chile.
Sa usa ka report sa Russia state news agency, giila sa Kamchatka Volcanic Eruption Response Team nga kining maong insidente maoy labing unang natala nga pagbusikad sa Krasheninnikov Volcano sulod sa 600 ka tuig.
Sumala pa sa maong ahensya, ang kataposang pagbusikad sa maong bulkan natala pa kaniadtong tuig 1463, ug sukad niadto wala na’y nahisgotang aktibidad sa pagbuto gawas sa karon nga panghitabo.
Matod pa sa Emergency Services sa Kamchatka, ang abo nga gibuga sa bulkan miabot sa taas nga 6 ka kilometro.
Tungod niini, gitaasan na ngadto sa orange aviation alert level ang bulkan, nga nagpasabot nga peligroso kini sa mga eroplano nga molupad duol sa dapit tungod sa nagkatag nga abo.
Padayon sab karun ang pagbantay sa mga otoridad sa aktibidad sa bulkan ug mga posibleng dugang nga seismic activity.
