Nakaabot sa 961,346 ka Pilipino ang nakabenepisyo sa P20 kada kilo nga bugas pinaagi sa programa sa gobyerno nga “Benteng Bigas, Meron Na!” niadtong Setyembre.
Base sa datos sa Department of Agriculture (DA), kini ang pinakadaghang benepisyaryo nga natabangan sulod sa usa ka bulan sukad gilunsad ang programa niadtong miaging tuig.
Lakip sa mga nakabenepisyo ang senior citizens, indigent families, solo parents, persons with disabilities (PWDs), mag-uuma, mangingisda ug minimum wage earners.
Sumala kang Agriculture Secretary Francisco P. Tiu Laurel Jr., kapin 5.6 milyones na ka Pilipino ang natabangan sa programa gikan Enero hangtod Setyembre.
Gikan sa Disyembre, tugotan na usab ang mga benepisyaryo nga kuhaon sa usa ka higayon ang ilang 30-kilo nga binulan nga alokasyon aron mapadali ang distribusyon ug mahatagan og luna ang mga bodega sa National Food Authority (NFA) alang sa bag-ong ani.
Tumong sa administrasyong Marcos nga ipadayon ang programa hangtod matapos ang termino niini sa Hunyo 2028 aron makatabang sa mga pamilyang nanginahanglan samtang gisuportahan ang lokal nga mga mag-uuma.
