Gibutyag sa labing taas nga Hukuman (Supreme Court) nga wala pa gi-abswelto si Bise Presidente Sara Duterte sa mga reklamo nga iyang giatubang, bisan pa man sa pagdeklara nga ‘unconstitutional’ ang mga articles of impeachment nga gisang-at batok kaniya sa House of Representatives.
Sumala ni Supreme Court Spokesperson Atty. Camille Sue Mae Ting, ang maong deklarasyon wala nagpasabot nga nawad-an og sala na ang bise presidente sa mga pasangil nga gilambigit kaniya.
Bisan pa man niini, iyang giangkon nga posible pa gihapon nga magsumite og bag-ong impeachment complaint batok sa maong opisyal, apan sa tuig 2026 pa kini mahimong buhaton.
Ang desisyon sa Korte Suprema migikan sa nakitang paglapas sa ‘1-year rule’ ug sa kakulangon sa pag-ila sa ‘due process’, nga gilatid sa Bill of Rights sa Konstitusyon.
Giklaro usab ni Atty. Ting nga makapamugos pa ang House of Representatives sa pagfile og mosyon aron marepaso sa Korte Suprema ang ilang gi-isyu nga resolusyon.
Dugang pa niya, iyang gipadayag ang sulod sa desisyon nga gisulat ni Senior Associate Justice Marvic M.V.F. Leonen, diin gibutya nga katungdanan sa Korte Suprema ang pagsiguro nga ang mga buhat nga legal ug konstitusyonal ang masunod.
Bisan pa man nga ang impeachment usa ka ‘political process’, gipasabot sa korte nga wala kini nagpasabot nga pulitika lamang ang basihan niini.
Sa nahitabong sesyon sa Supreme Court en banc kagahapon, nagkahiusa ang mga mahistrado sa ilang pagboto nga pabor sa deklarasyon.
Tungod niini, ang articles of impeachment nga gipasa sa House of Representatives padulong sa Senado, gibasura sa Korte Suprema, nga giingong ‘unconstitutional’ ug ‘null and void’.
